ايمان
ايمان، رسولِ أكرم عليه الصلاة والسلامكۡ تبليغ ايتديگى ضرورياتِ دينيه‌يى تفصيلاً و ضرورياتكۡ غيريسنى إجمالاً تصديق ايتمكدن حاصل اولان بر نوردر.
سؤال: عوامِ ناسدن، حقائقِ دينيه‌يى تعبير ايدن آنجق يوزده بردر؟
جواب: تعبير ايتمه‌مسى، بيلمه‌مسنه دليل اولاماز. أوت چوق دفعه لسان، إنسانكۡ تصوّراتندن اينجه‌لرينى تعبيردن عاجز اولديغى گبى قلبنده‌كى و وجداننده‌كى اينجه‌لر ده عقله گورونمز. حتّى بلاغت داهيلرندن سكّاكى گبى بر ذات؛ إمرئ القيس ويا باشقه بر بدوينكۡ إبراز ايتديگى بلاغت اينجه‌لرينى قاورامامشدر. مع هذا ايمانكۡ وار اولوب اولماديغى صورغو ايله آكۡلاشيلير. مثلا عامى بر آدمه، بو عالم بتون جهتلرى ايله، أجزاسيله قدرتنده، تصرّفنده بولنان صانعكۡ ياراتديغى بو عالمكۡ بر جهتنده اولوب اولماديغى گبى بر صورغو ياپيلديغى زمان، “هيچ بر جهتنده دگلدر” ديسه كافيدر. چونكه نفى جهتنكۡ يعنى صانعسز اولاميه‌جغنكۡ اونكۡ وجداننده ثابت اولديغنه دلالت ايدر.
ايمان، سعدِ تفتازانينكۡ تفسيرينه گوره: “جنابِ حقّكۡ ايستديگى قولنكۡ قلبنه، جزءِ إختيارينكۡ صرفندن صوكۡره إلقا ايتديگى بر نوردر.” دينلمشدر. اويله ايسه ايمان، شمسِ أزليدن وجدانِ بشره إحسان ايديلن بر نور و بر شعاعدر كه، وجدانكۡ ايچ يوزينى تماميله ايشيقلانديرر. و بو سايه‌ده بتون كائنات ايله بر اُنسيت، بر أمنيت پيدا اولور. و هر شيله كسبِ معارفه ايدر. و إنسانكۡ قلبنده اويله بر قوّهِٔ معنويه حصوله گلير كه، إنسان او قوّت ايله هر مصيبته، هر حادثه‌يه قارشى مقاومت ايده‌بيلير. و اويله بر وسعت و گنيشلك ويرر كه، إنسان او وسعتله گچمش و گله‌جك زمانلرى يوتابيلير.
و كذا ايمان، شمسِ أزليدن إحسان ايديلمش بر نور اولديغى گبى؛ سعادتِ أبديه‌دن ده بر پاريلتيدر. و او پاريلتى ايله، وجداننده بولنان بتون أمل و إستعدادلرينكۡ تخملرى، بر شجرهِٔ طوبٰى گبى نشو و نمايه باشلار، أبد مملكتنه طوغرى حركت ايدر، گيدر.
(İşarat-ül İ’caz 41 p son) إشارات الإعجاز ٤٢ پ٢
توحيد دخى ايكى چشيددر:
برى: توحيدِ عامى و ظاهريدر كه، “جنابِ حق بردر، شريكى نظيرى يوقدر، بو كائنات اونكۡدر.”
ايكنجيسى: توحيدِ حقيقيدر كه، هر شى اوستنده سكّهِٔ قدرتنى و خاتمِ ربوبيتنى و نقشِ قلمنى گورمكله طوغريدن طوغرى‌يه هر شيدن اونكۡ نورينه قارشى بر پنجره آچوب اونكۡ برلگنه و هر شى اونكۡ دستِ قدرتندن چيقديغنه و الوهيتنده و ربوبيتنده و ملكنده هيچ بر وجهله، هيچ بر شريكى و معينى اولماديغنه، شهوده ياقين بر يقين ايله تصديق ايدوب ايمان گتيرمكدر و بر نوع حضورِ دائمى ألده ايتمكدر.
سوزلر ٣٧٧ پ٢ (Sözler 293 p1)
اللّٰهى بيلمك، بتون كائناته إحاطه ايدن ربوبيتنه و ذرّه‌لردن ييلديزلره قدر جزئى و كلّى هر شى اونكۡ قبضهِٔ تصرّفنده و قدرت و إراده‌سيله اولديغنه قطعى ايمان ايتمك و ملكنده هيچ بر شريكى اولماديغنه و‌لاَ اِلٰهَ اِلاَّ اللّٰهُ كلمهِٔ قدسيه‌سنه، حقيقتلرينه ايمان ايتمك، قلبًا تصديق ايتمكله اولور. يوقسه “بر اللّٰه وار“دييوب، بتون ملكنى أسبابه و طبيعته تقسيم ايتمك و اونلره إسناد ايتمك، حاشا حدسز شريكلرى حكمنده أسبابى مرجع طانيمق و هر شيئكۡ ياننده حاضر إراده و علمنى بيلمه‌مك و شدّتلى أمرلرينى طانيمه‌مق و صفتلرينى و گوندرديگى ألچيلرينى، پيغمبرلرينى بيلمه‌مك، ألبته هيچ بر جهتده اللّٰهه ايمان حقيقتى اونده يوقدر. بلكه كفرِ مطلقده‌كى معنوى جهنّمكۡ دنيوى تعذيبندن كندينى بر درجه تسلّى‌يه آلمق ايچون او سوزلرى سويلر.
أوت إنكار ايتمه‌مك باشقه‌در، ايمان ايتمك بتون بتون باشقه‌در.
أوت كائناتده هيچ بر ذى‌شعور، كائناتكۡ بتون أجزاسى قدر شاهدلرى بولونان خالقِ ذو الجلالى إنكار ايده‌مز. ايتسه، بتون كائنات اونى تكذيب ايده‌جگى ايچون صوصار، لاقيد قالير. فقط اوكۡا ايمان ايتمك: قرآنِ عظيم الشانكۡ درس ويرديگى گبى، او خالقى صفتلرى ايله، إسملرى ايله عموم كائناتكۡ شهادتنه إستنادًا قلبًا تصديق ايتمك و ألچيلريله گوندرديگى أمرلرى طانيمق؛ و گناه و أمره مخالفت ايتديگى وقت، قلبًا توبه و ندامت ايتمك ايله‌در. يوقسه، بيوك گناهلرى سربست ايشله‌يوب إستغفار ايتمه‌مك و آلديرمامق، او ايماندن حصّه‌سى اولماديغنه دليلدر.
أميرطاغ لاحقه‌سى ١ ٢٤٧ پ صوكۡ (Emirdağ Lahikası I 247 p son)
ايمان، يالكۡز إجمالى و تقليدى بر تصديقه منحصر دگل. بر چكردكدن، تا بيوك خرما آغاجنه قدر و ألده‌كى آيينه‌ده گورونن مثالى گونشدن تا دكۡز يوزنده‌كى عكسنه، تا گونشه قدر مرتبه‌لرى و إنكشافلرى اولديغى گبى؛ ايمانكۡ او درجه كثرتلى حقيقتلرى وار كه، بيكۡ بر أسماءِ إلٰهيه و سائر أركانِ ايمانيه‌نكۡ كائنات حقيقتلريله علاقه‌دار چوق حقيقتلرى وار كه: “بتون علملركۡ و معرفتلركۡ و كمالاتِ إنسانيه‌نكۡ أكۡ بيوگى ايماندر و ايمانِ تحقيقيدن گلن تفصيللى و برهانلى معرفتِ قدسيه‌در” دييه أهلِ حقيقت إتّفاق ايتمشلر.
أوت ايمانِ تقليدى، چابوق شبهه‌لره مغلوب اولور. اوندن چوق قوّتلى و چوق گنيش اولان ايمانِ تحقيقيده پك چوق مراتب وار. او مراتبلردن علم اليقين مرتبه‌سى، چوق برهانلرينكۡ قوّتلريله بيكۡلر شبهه‌لره قارشى طايانير. حالبوكه تقليدى ايمان بر شبهه‌يه قارشى بعضًا مغلوب اولور.
هم ايمانِ تحقيقينكۡ بر مرتبه‌سى ده عين اليقين درجه‌سيدر كه، پك چوق مرتبه‌لرى وار. بلكه أسماءِ إلٰهيه عددنجه تظاهر درجه‌لرى وار. بتون كائناتى بر قرآن گبى اوقويه‌بيله‌جك درجه‌سنه گلير. هم بر مرتبه‌سى ده حقّ اليقيندر. اونكۡ ده چوق مرتبه‌لرى وار. بويله ايمانلى ذاتلره شبهات اوردولرى هجوم ده ايتسه، بر خلط ايده‌مز. و علماءِ علمِ كلامكۡ بيكۡلر جلد كتابلرى، عقله و منطغه إستنادًا تأليف ايديلوب، يالكۡز او معرفتِ ايمانيه‌نكۡ برهانلى و عقلى بر يولنى گوسترمشلر. و أهلِ حقيقتكۡ يوزر كتابلرى كشفه، ذوقه إستنادًا او معرفتِ ايمانيه‌يى داها باشقه بر جهتده إظهار ايتمشلر. فقط قرآنكۡ معجزه‌كار جادّهِٔ كبراسى، گوسترديگى حقائقِ ايمانيه و معرفتِ قدسيه؛ او علما و أوليانكۡ پك چوق فوقنده بر قوّت و يوكسكلكده‌در.
٢ سكّهِٔ تصديقِ غيبى ٢٨٨ پ (Sikke-i Tasdik-i Gaybi 217 p son)
هم ايمانده، اويله فوق العاده بر قوّت و خارقه بر يقين و معجزانه بر إنكشاف و جهانى ايشيقلانديران بر علوى إعتقاد طاشيمش كه؛ او زمانكۡ حكمرانى اولان بتون أفكار و عقيده‌لرى و حكمانكۡ حكمتلرى و روحانى رئيسلركۡ علملرى اوكۡا معارض و مخالف و منكِر اولدقلرى حالده؛اونكۡ نه يقيننه، نه إعتقادينه، نه إعتمادينه، نه إطمئناننه هيچ بر شبهه، هيچ بر تردّد، هيچ بر ضعف،هيچ بر وسوسه ويرمه‌مسى و معنوياتده و مراتبِ ايمانيه‌ده ترقّى ايدن باشده صحابه‌لر و بتون أهلِ ولايت، اونكۡ هر وقت مرتبهِٔ ايمانندن فيض آلمالرى و اونى أكۡ يوكسك درجه‌ده بولمالرى، بِالبداهه گوسترر كه؛ ايمانى دخى أمثالسزدر.
شعاعلر ٢٥٣ پ صوكۡ (Şualar 129 p3)
سؤال: دينلييور كه: صحابه‌لر رسولِ أكرم عليه الصلاة والسلامى گورديلر، صوكۡره ايمان ايتديلر. بز ايسه گورمه‌دن ايمان ايتدك. اويله ايسه، ايمانمز داها قويدر. هم، قوّتِ ايمانمزه دلالت ايدن روايت وار؟
الجواب: صحابه‌لر او زمانده، أفكارِ عامّهِٔ عالم حقائقِ إسلاميه‌يه معارض و مخالف ايكن؛ (صحابه‌لر) يالكۡز صورتِ إنسانيه‌ده رسولِ أكرم عليه الصلاة والسلامى گوروب، بعضًا معجزه‌سز اولارق، اويله بر ايمان گتيرمشلر كه؛ بتون أفكارِ عامّهِٔ عالم، اونلركۡ ايمانلرينى صارصمايوردى.شبهه دگل، بعضسنه وسوسه ده ويرمزدى. سزلر ايسه‌كۡز كندى ايمانكۡزى، صحابه‌لركۡ ايمانلريله موازنه ايدييورسكۡز. بتون أفكارِ عامّهِٔ إسلاميه، ايمانكۡزه قوّت و سند اولديغى حالده؛ رسولِ أكرم عليه الصلاة والسلامكۡ شجرهِٔ طوباءِ نبوّتنكۡ چكردگى اولان بشريتى و صورتِ جسمانيه‌سنى دگل، بلكه عموم أنوارِ إسلاميه و حقائقِ قرآنيه ايله نورانى محتشم شخصِ معنويسنى بيكۡ معجزات ايله محاط اولارق عقل گوزيله گورديگكۡز حالده، بر آوروپا فيلسوفنكۡ سوزيله وسوسه‌يه و شبهه‌يه دوشن ايمانكۡز نره‌ده؟
سوزلر ٦٤٠ پ١ (Sözler 494 p2)
معنًا روحه گلدى؛ نه‌دن بر جزئى حقيقتِ ايمانيه‌يى إنكار ايدن كافر اولور و قبول ايتمه‌ين مسلمان اولماز؟ حالبوكه اللّٰه و آخرته ايمان بر گونش گبى او قراكۡلغى إزاله ايتمك لازم گلييور. هم نه‌دن بر ركن و حقيقتِ ايمانيه‌يى إنكار ايدن مرتد اولور، كفرِ مطلقه دوشر و قبول ايتمه‌ين إسلاميتدن چيقار؟ حالبوكه سائر أركانِ ايمانيه‌يه ايمانى وارسه، اونى كفرِ مطلقدن قورتارمق لازم گلييور؟
الجواب: ايمان آلتى ركنندن چيقان اويله بر وحدانى حقيقتدر كه، تفريق قبول ايتمز. و اويله بر كلّيدر كه، تجزّى قالديرماز. و اويله بر كلّدر كه قابلِ إنقسام اولمازلر. چونكه هر بر ركنِ ايمانى، كندينى إثبات ايدن حجّتلريله سائر أركانِ ايمانيه‌يى إثبات ايدر. هر برى هر بريسنه غايت قوّتلى بر حجّتِ أعظم اولور. اويله ايسه بتون أركانى، بتون دليللريله صارصميان بر فكرِ باطل، حقيقت نظرنده بر تك ركنى، بلكه بر حقيقتى إبطال ايدوب إنكار ايده‌مز. بلكه عدمِ قبول پرده‌سى آلتنده گوزينى قپامقله، بر كفرِ عنادى ياپابيلير. گيت گيده كفرِ مطلقه دوشر، إنسانيتى محو اولور. هم مادّى، هم معنوى جهنّمه گيدر.
شعاعلر ٤١٧ پ١ (Şualar 237 p1)
“بو عجيب زمانكۡ أكۡ بيوك تهلكه‌سى، حديثِ شريفله ثابت اولان آخر زمانده چوق أهلِ سفاهت و غفلت دنيادن ايمانسز چيقمق ياره‌سنى لسانِ قرآنِ معجز البيانله، قبره ايمان ايله گيرمك علاجيله تداوى ايدن رسالة النور شاكردلرينه بر حجّتِ …قاطعه بخش ايدن رسالة النوره خدمت
٢٥١پ١ سكّهِٔ تصديقِ غيبى ( Sikke-i Tasdik-i Gaybi 186 p3)
و بِالخاصّه كفوِّ شرعى تعبير ايديلن، بربرينه سجيةً و ديانةً لياقت بولنمديغندن داها زياده عذاب چكديرر. و بِالخاصّه تربيهِٔ إسلاميه خارجنده، مسلمان نامى آلتنده اولانلر، ايماندن گلن حرمت و مرحمتِ متقابله‌يى بولامدقلرندن بتون بتون سعادتِ حياتيه‌يى محو ايدييور، جهنّم عذابى چكديرييور.
قسطمونى لاحقه‌سى ٢٧٦ پ صوكۡ (Kastamonu Lahikası 252 p son)
برنجى أماره: ايمانِ تحقيقى علم اليقيندن حقّ اليقينه ياقينلاشدقجه داها سلب ايديلميه‌جگنه أهلِ كشف و تحقيق حكم ايتمشلر. ديمشلر كه: سكرات وقتنده شيطان وسوسه‌سيله آنجق عقله شبهه‌لر ويروب تردّده دوشوره‌بيلير. بو نوع ايمانِ تحقيقى ايسه يالكۡز عقلده طورمييور. بلكه هم قلبه، هم روحه، هم سرّه، هم اويله لطائفه سرايت ايدييور، كوكله‌شييور كه، شيطانكۡ ألى او يرلره يتيشه‌مييور؛اويله‌لركۡ ايمانى زوالدن محفوظ قالييور.
بو ايمانِ تحقيقينكۡ وصولنه وسيله اولان بر يولى، ولايتِ كامله ايله كشف و شهود ايله حقيقته يتيشمكدر. بو يول أخصِّ خواصّه مخصوصدر، ايمانِ شهوديدر.
ايكنجى يول: ايمانِ بِالغيب جهتنده سرِّ وحيكۡ فيضيله برهانى و قرآنى بر طرزده، عقل و قلبكۡ إمتزاجيله حقّ اليقين درجه‌سنده بر قوّت ايله، ضرورت و بداهت درجه‌سنه گلن بر علم اليقين ايله حقائقِ ايمانيه‌يى تصديق ايتمكدر. بو ايكنجى يول؛ رسالهِٔ نوركۡ أساسى، مايه‌سى، تملى، روحى، حقيقتى اولديغنى خاص طلبه‌لرى گورويورلر.
سكّهِٔ تصديقِ غيبى ٣٣پ١ (Sikke-i Tasdik-i Gaybi 29 p2)
ايمانكۡ اوچ خاصّه‌سى واردر:
١ – نقطهِٔ إستنادندن نشئت ايدن عزّتِ نفسدر. عزّتِ نفسى اولان، باشقه‌لره كنديسنى ذليل گوسترمگه تنزّل ايتمز.
٢ – شفقتدر. شفقتى اولان، كيمسه‌يى تحقير و تذليل ايتمز.
٣ – حقيقتلره إحترام ايتمك و يوكسك شيلركۡ قيمتنى بيلمكله إستخفاف ايتمه‌مكدر.
كذالك، ايمانكۡ ضدّى اولان نفاقكۡ ده اوچ خاصّه‌سى واردر:
١ – ذلّتدر.
٢ – إفساداته مَيل ايتمكدر.
٣ – باشقه‌لرى تحقير ايتمكله غرورلانوب ذوق آلمقدر.
إشارات الإعجاز ١٠٤ پ٢
ايمان هم نوردر، هم قوّتدر. أوت حقيقى ايمانى ألده ايدن آدم، كائناته ميدان اوقويابيلير و ايمانكۡ قوّتنه گوره حادثاتكۡ تضييقاتندن قورتولابيلير. تَوَكَّلْتُ عَلَى اللّٰهِ دير، سفينهِٔ حياتده كمالِ أمنيتله حادثاتكۡ طاغلروارى طالغه‌لرى ايچنده سيران ايدر. بتون آغيرلقلرينى قديرِ مطلقكۡ يدِ قدرتنه أمانت ايدر، راحتله دنيادن گچر، برزخده إستراحت ايدر. صوكۡره سعادتِ أبديه‌يه گيرمك ايچون جنّته اوچابيلير. يوقسه توكّل ايتمزسه، دنيانكۡ آغيرلقلرى اوچماسنه دگل، بلكه أسفلِ سافلينه چكر. ديمك ايمان توحيدى،توحيد تسليمى، تسليم توكّلى، توكّل سعادتِ داريْنى إقتضا ايدر.
سوزلر ٤٠٦ پ صوكۡ (Sözler 314 p son)
إسلاميت، إلتزامدر؛ ايمان، إذعاندر. تعبيرِ ديگرله: إسلاميت، حقّه طرفگيرلك و تسليم و إنقياددر؛ ايمان ايسه، حقّى قبول و تصديقدر. أسكيده بعض دينسزلرى گوردم كه: أحكامِ قرآنيه‌يه شدّتلى طرفگيرلك گوسترييورلردى. ديمك او دينسز، بر جهتده حقّكۡ إلتزاميله إسلاميته مظهردى؛“دينسز بر مسلمان” دينيليردى. صوكۡره بعض مؤمنلرى گوردم كه؛ أحكامِ قرآنيه‌يه طرفگيرلك گوسترمييورلر، إلتزام ايتمييورلر.. “غيرِ مسلم بر مؤمن” تعبيرينه مظهر اولويورلر.
عجبا إسلاميتسز ايمان، مدارِ نجات اولابيلير مى؟
الجواب: ايمانسز إسلاميت، سببِ نجات اولماديغى گبى؛ إسلاميتسز ايمان ده مدارِ نجات اولاماز.
مكتوبات ٤٤ پ٢ (Mektubat 34 p5)
الحاصل: ناصلكه ايمان، ئولوم وقتنده إنسانى إعدامِ أبديدن قورتارييور؛ اويله ده هركسكۡ خصوصى دنياسنى دخى إعدامدن و هيچلك قراكۡلقلرندن قورتارييور. و كفر ايسه خصوصًا كفرِ مطلق اولسه؛ هم او إنسانى، هم خصوصى دنياسنى ئولومله إعدام ايدوب معنوى جهنّم ظلمتلرينه آتار.حياتنكۡ لذّتلرينى آجى زهرلره چويرر. حياتِ دنيويه‌يى آخرتنه ترجيح ايدنلركۡ قولاقلرى چينلاسين.گلسينلر، بوكۡا يا بر چاره بولسونلر ويا ايمانه گيرسينلر. بو دهشتلى خساراتدن قورتولسونلر!..
شعاعلر ٤٤٠ پ صوكۡ (Şualar 254 p son)
هم إنسانده مادام نفس، هوا و وهم و شيطان حكم ايدييورلر، چوق وقت ايماننى رنجيده ايتمك ايچون غفلتندن إستفاده ايده‌رك چوق حيله‌لرى ايدرلر، شبهه و وسوسه‌لرله ايمان نورينى قاپارلر. همظاهرِ شريعته مخالف دوشن و حتّى بعض إماملر نظرنده كفر درجه‌سنده تأثير ايدن كلمات و حركات أكسيك اولمايور. اونكۡ ايچون هر وقت، هر ساعت، هر گون تجديدِ ايمانه بر إحتياج واردر.
مكتوبات ٤٧٢ پ١ (Mektubat 333 p1 )
ص